Субҳи 8 июли 2023 бохабар шудам, ки ҳофизи хушхони Қуръони Карим, довари байналмилалии Қуръон – ки ин, дар Тоҷикистон собиқа надошт, барои аввалин бор дар таърихи муосири кишвари азизамон аст, ки як нафар тоҷик ба унвони довари байналмилалӣ дар мусобиқоти Қуръон ҳузур меёбад – фориғуттаҳсил ва сипас устоди Донишгоҳи байналмилалии Мустафо ал-оламия, дӯст ва бародари азизам, Самаруддин Самадов дори фониро тарк гуфтааст.
Вақте ин хабар ба гӯшам расид, бовараш бароям сахт буд, эшони Сайидисҳоқ хабарам кард, марҳум ҳеч оризае надошт ва аз ҳеч беморие ранҷ намебурд, солими солим буд, дар авҷи ҷавонӣ қарор дошт, ба назарам 40 сол – бештар ё камтар – син дошт. Бале, аҷал, ки фаро расид, ин ҳарфҳо нест, вале билохира одами солим, ки ҳамин гуна вафот намекунад, як сабабе бояд бошад.
Қорӣ Самаруддин дар феврали ҳамин сол (2023) дар 39-умин давраи мусобиқоти байналмилалии Қуръони Карим, ки дар Теҳрон баргузор шуд, ба унвони довар (судя) ҳузур пайдо кард. Ин ҳодиса – чунон ки гуфтам – барои аввалин бор дар таърихи муосири Тоҷикистон аст.
Худо раҳматаш кунад қориҷонро! Бисёр дӯсташ медоштем, одами бонамаке буд!
Ҷойгоҳаш биҳишт!
Дӯстон, ҳатман барои қорӣ фотеҳа бихонанд.
Қорӣ Самаруддин Самадов зодаи деҳаи Қурбоншаҳиди ноҳияи Восеъи вилояти Хатлон аст. Чанд соли ахир дар пойтахт, шаҳри Душанбе зиндагӣ мекард, агар иштибоҳ накунам масъули умури ҷавонон дар Донишгоҳи миллӣ буд.
Сайидюнуси Истаравшанӣ
Ҳамоно ин Қуръон ба он [роҳе] ки он устувортар аст, ҳидоят мекунад ва ба мӯъминоне, ки корҳои шоиста анҷом медиҳанд, башорат медиҳад, ки барои онҳо подоши бузургест. "Исро ояти 9"
Menu